من يوميات محجبــــة (1)

من يوميات فتاة مسلمة (1):

النهاردة والحمدلله نويتها
آه نويتها وبقول يارب بجد

النهاردة قررت انى هالبس الحجاب
بس مش اى حجاب .. مش ال ع بنطلون وبادى قصير دة
لأ انا اخترت اخيرا الحجاب الصح

اينعم انا كنت مترددة جدا فانى اخد الخطوة دى دايمآ وكان السبب هو خوفي من ان ارجع عنه بعد ما البسه ودة كان شعور سئ حبيتين لأن بيقولوا يعنى ان كلامى كلام رجالة وما برجعش ف كلمتى وكدة فكنت خايفة استعيل وارجع ف كلامى ف يوم م الايام ودة كان مخلينى دايمآ مأجلة الحوار دة..

كنت بفرح اوى اوى لما الاقي فلانة ولا فلانة لبسوه وببأه بعنيا شايفة اد ايه وشهم نور واد ايه بأوا اجمل واحلى لا وكمان عند ربنا اغلى

بس مش هاكدب عليكو كنت باحبط جدا جدا لما الاقى واحدة فيهم تخلعه وكان دة بيرعبنى
ياترى هو ايه السبب ال خلاهم يخلعوه؟

وكنت بخاف لاحسن ابأه زيهم وابأة البنت ال اختارت تبعد ع طريق ربها بعد ما اختارته كأنى بقوله يارب انا مشيت ف طريقك بس الصراحة معجبنيش فرجعت عنه
!!

كنت بخاف انى ابأة زيهم كدة السبب فى انى اخلى غيرى يتردد ف انه يقدم ع الخطوة دى
وان ممكن اوقف ناس م انهم يطيعوا ربنا


ومعلش يعنى ي جدعان ولا مؤاخـذة يعنى
انا مش مقتنعة بحوار بنت تخلعه عشان طالعة رحلة ولا رايحة مصيف ولا رايحة حفلة ولا تخلعه عشان شغلها ولا ولا ولا .... الخ

بصي ي ستى انا بقولك الكلام دة وقبلها بقوله والله لنفسي
(( لازم يبأه عندك مبــــــدأ ))
هتقوليلي وهو الحجاب مبدأ؟؟
هقولك طبعآ ي بنتى

هو مش انتى لبستيه عشان تحمى جزء م جسمك عن عيون البشر عشان ترضي بدة رب البشر
؟؟؟

دة ف حد ذاته ارقي واعلى واقوى مبدأ ولازم تبأى اده وتتمسكى بيه مهما كانت المغريات..

وعشان كدة انا النهاردة انا هاخد الخطوة مفيش كلام
"""ولا تراجع ولا استسلام""""
^_^

بأذن الله هاكون حاجة مشرفة للزى ال انا لابساه دة سواء ف اخلاقي او تصرفاتى او تعاملاتى..

بأذن الله هاكون احلى فيه يمكن لما بنت تشوفنى بيه تقرر انها تلبسه وابأه اخدت ثواب..

بأذن الله هحاول اوصل لكل ال حواليا ان الشياكة مش انى البس ضيق و ولا انى ابين شعرى او ابين غيره..

ممكن ابأه شيك وجدا بس وانا محافظة ع نفسي م عيون الناس ال ممكن تبصلي بصة اى كلام باستغراب وانا طبعا ف غنى عن ربع بصة م دى..

بأذن الله نيتى دى تتحط ف ميزانى لأن بجد انا لابساه عشانك انت وبس ي رب مش عشان يقولوا دى فلانة لبست الحجاب او غيره!!

وياريت تحاولى تاخدي النية دى انتى كمان
لأن صدقينى احنا ممكن نكون بنعمل غلطات كتير ف حياتنا اصل احنا بشر برضو
بس لو اخدنا خطوة واحدة بس لربنا ممكن بالخطوة دى تتغير كل حياتنا..
:)

وعشان كدة انا نفسي تحتفلي معايا بمرور سنتين كاملين ع لبسي الحجاب
^_^
شوفتى المفاجـــــأة؟؟ :))

يااااس عدى سنتين هوا ولا حسيت بيهم آت اوووووول ..خالص يعنى^_^

وع فكرة ال بتكلمك دى مكانتش هتلبسه ولا هتقولك الكلام دة الا بفضل ربنا
وعشان كدة بقولك يا بنت الناس الطيبين مش عشان رضا الناس عليكى منك تزعلى ربنا

:)
يلا منى السلام بس دة مش الختام واستنوا منى يوميتى الجاية ^_^