نفسي اكتب بقلم رصاص مكتوب عليه " صنع فى مصــــــر"
و سجادة الصلاة وفانوس رمضان ما يبقوش صنع ف الصين!!
نفسي ال يلبس القطن المصري الأفخم ف العالم هو الموظف المصري البسيط
مش بس الملوك واصحاب القصور والملايين !!
نفسي الاقي الشارع نضيف دايما وال يرمى ورقة ف الارض يبقي حاسس انه بيعمل حاجة غلط
وان ع الاقل الاقي سلة الزبالة ال ارمى فيها الورقة مش ادوخ السبع دوخات ع مكان ارمى فيه !!
نفسي ما يبقاش فى ظلم م اى نوع
وال يفترى يتعاقب واقوله ف وشه بأعلى صوت
ايه ي عمنــــا ماتفووووووق كدة
دى البـلد فيـــــــــها قــــــــانون
ابقى وانا بقولها واثق مليون ف المية ان القانون دة هيحمينى ومش هيجى مع ال ظالمنى
عشان نفوذه او سلطته او فلوسه !!
ونشيل من قاموسنا بقى جملة (القانون لا يحمى المغفلين) !!
نفسي لو مفيش ظابط مرور واقف مالاقيش حد ماشي مخالف ولو فيه اشارة الكل يقف فيها !!
نفسي ال يذاكر ياخد ع اد مايتعب
وماتبقاش بختك يابو بخيت وال حل زى ال ما حلش !!
أو تلاقي كله معرفش يحل اى حاجة
وفى ناس شايلة وناس جايبة قرب النهائى
طب منين ي جدعان ؟!!!؟
نفسي يكون فيه رقابة ع دكاترة الجامعة
ومش عشان ولد كح ف المحاضرة والدكتور ماعجبتوش كحته
يقوم مشيله المادة بتاعته عشرتلاف مرة !!
نفسي ابطل اذاااكر مناااااااهج قديمة وغلط وطلع الاحسن منها والاحدث لمجرد ان عايزة رضا الدكتور عنى عشان انجح وتووووووولع دماغى !!!
نفسي المدارس الحكومية تبأه زى المدارس الخاصة
وماتبقاش المدارس الحكومية تعبانة ف الامكانيات والمستوى التعليمى
نفسي اذاكر م الكتاب ويجيلي منه الامتحان
مش يتفنن واضع الامتحان ف انه يحط اسئلة محدش يعرف يحلها
زى ما يكون بيتحدانى انى لازم اطلع م الامتحان سايب اسئلة اد كدة
وي سلام لو ثانوية عامة بقى ..النص درجة بتفرق !!
ببقى والله عايزة اقول للى بيحط الامتحان ..
والنعمة انا مش عدوتك ياعمو !!!
دة انا زى عيالك وربنا ..والنص درجة ال بتضيعها بفزلكتك دى متشعلق فيها مستقبلي كله !!!
نفسي يبقي شغلنا الشاغل مش الاهلى او الزمالك
او الممثل الفلانى ولا المغنية الفلانية
وان تبقي اهتماماتنا بآخر اختراع او بحث علمى اتعمل ف الموضوع الفلانى
او ايه آخر برنامج دينى ناجح عمله الشيخ فلان
دة ما يمنعش ان نتفرج ع ابوتريكة والاهلى ونتفرج ع افلام والخ والدنيا تمام
بس ماينفعش يبقي اهتمامنا كله بالحاجات دى وبــــــــس !!
نفسي ابطل اسمع شتايم خاااااااااالص
سواء ف الشارع او ع الفيس او ف اى حتة !!
نفسي المدارس تعلم الاطفال يعنى ايه احترام العلم
((يعنى تحية العلم الصبح تبقي بتتقال والعلم ((قماشته نضيفة ومغسولة
مش تفضل قرون متعلقة لحد ماتتفرول ومايبقاش ليه اى معالم
والنسر بيبقى خلاص شوية وهيطفش م العلم لأنه مبيكونش باين فيه اصلا!!
نفسي التعليم بتاعنا يبقي فى قوة التعليم البريطانى
بس ف نفس الوقت يبقي محافظ ع هيئته العربيـــــــة !!
يعنى أخلى الآيات القرآنية وما اقللهاش
وأحط مكانها نصوص شعر او نثر !!!
او ما اخليش مادة الدين مادة مهملة ثانوية وممكن ماتلاقيلهاش مدرس يخش يدرسها
لان بيتهيألى لو شيلت الدين م اى حاجة
يبقي مفيش طوبة اساس تبنى عليها اى جيل عايز تطور بيه اى بلد !!
نفسي مايبقاش ابن المهندس مهندس وابن وكيل النيابة وكيل نيابة وابن الدكتور دكتور كدة وخلاص
ليه ميكونش فيه تكافؤ فرص ؟؟؟
يعنى ال طلع الدنيا ولقي ابوه عامل بسيط مش م حقه يبقي حاجة احسن تناسب امكانيات دماغه دى ولا ايه؟!؟
نفسي اى بلد ف العالم ليها اى نوع م انواع القوة
تيجى عند بلدى وتفرمل
ويعرفوا اننا مش لقمة سهلة دة احنا مرين اووووووى
وان يكون دة مش بس بالكلام
لأ..بالورقة والقلم
اقتصاديآ ..سياسيآ..اجتماعيآ..حربيآ .. تكنولوجيآ ..حتى اعلاميآ
نبقى احنا الاحسن وليه لأ؟؟!!؟؟
نفسي الجنسية المصرية الكل يتهافت عشان ياخدها ..
زى ما الناس ف العاالم كله بتسعى انها تاخد مثلا الجنسية الامريكية !!
نفسي المواطن المصري برة بلده يبقي ليه احترامه وكرامته وعزته ومايتهانش
ولو اتهان يبقي ف الف حسااااااب للى اتهور وعمل دة !!
نفسي افضل فخورة انى مصرية وافضل رافعة راسي زى ما انا رافعاها دلوقتى
وللأبـــــــــــــــــــــــــ
نفسى ف حاجااااااااااااااااااااااااااا
ويمكن لو هاكتب مش هخلصها
واكيد كل واحد فينا نفسه ف حاجات كتير لبلده ..لاهله..لنفسه..ولولاده ادام
بداية اى انجاز ان اقول انا نفسي ف دة
وأصدق نفسي ف ان فعلا انا عايزة دة
لو صدقت نفسي هجرى ورا حلمى وهشتغل عليه
ع الاقل هبدأ بنفسي ومثلا اشد حيلي ف مذاكرتى
او هشتغل ف مكانى بضمير وهابطل ازوغ م الشغل بدرى
مش هعلى سعر الكشف ف عيادتى وامص ف فلوس العيانين او ان اطلع عنده امراض الدنيا والآخرة وهو يدوبك عنده حبة زكام !!!
مش هكون محامى بيدارى ع الفساد
لأ ان هدافع عن حقوق المظلووووم مش هطلع الظالم م السجن !!
مش هكون المهندس ال يبنى عمارة تقع تانى يوم الصبح ع الساعة 6 كدة وهو لسه مشطبها ع الساعة 5 صباحا برضو!!
هاحلم انى ابقي احسن حاجة ف مكانى وهاتعب واشتغل عشان اوصل لدة
هبطل اشكى واقول ي عينى ما نصيبي كدة !!
لأ هغير م الوضع ال انا فيه وللأفضل
يعنى هو ال طلع الفضاء دة كان يعرف ان فيه فضاء اصلا؟؟!!؟
وقبل مهعمل واصلح كل الحاجات دى
هصلح حاجة بكل ال فااااااااااااااااااااااات دة
هصلح
.
.
.
.
علاقتــــــــــــــــــى بربنـــــــــــــــــــــــــا
:)
وهاتحدانــــــــــــــــــــــ
ليست هناك تعليقات:
إرسال تعليق