مش هى دى مصـــر اللى بيقولوا عليها !

بعد ما المصرى وقف ف وش المصري اللى زيه !! ... كتبت :
--------------------
معلش يا بنتى..هو انتى من هنا ؟
باين لى كدة غلطت فى العنوان !

...ولا مؤاخذة ف السؤال يعنى..
الا دى مصـــــر اللى بيقولوا عليها؟!
اصل انا بشبه عليها من بعيد ....!!

هى ملامحها متغيرة كدة ليه؟؟
مش زى آخر مرة شوفتها !!

و مالها هدومها متقطعة ومرمية على الارض كدة ليه؟؟
وايه اللمة الكبيرة دى كلها ؟؟

ايه دة؟؟
مين الناس الكتير دول؟؟
ومالهم واقفين قصاد بعض كدة ليه؟؟

وهى ليه مصـــــــــــر فى النص ما بينهم بالمنظر دة؟
هم بيتخانقوا عليها ولا ايه؟؟
طب استروها وغطوها الاول وبعدين ابقو اتخانقوا؟؟

حاسب حاسب...الطوب اللى بتموتوا بيه بعض دة بيجى فيها؟؟


انا شايفها بتنجرح وبتنزف وبتتعور
وانتو مش شايفينها من كتر الزحمة والتهور

خدوا باااااالكو...
دى بتصرخ وانتو مش سامعينها...
بتنادى وبتتألم والصوت مش واصل!!

كفاية ...
بصوا لها بعين الرأفة وارحموها..

دى وسطيكوا وباندفاعكو بتدوسوا عليها !!
ومش قادرة حتى تقف عشان تحوش ما بينكو... !!!

لانكو ارهقتوها...
شيبتوها...
حيرتوها...
وفى الآخر صدمتوها..!!

و عاشت لليوم اللى شافت ولادها واقفين قدام بعض..
وبيحاولوا يأذوا و يحرقوا بعض..
ومستنين مين ي ترى اللى هيكسب وهيجيب التانى الارض!!

عارفين يعنى ايه أم تلاقي ولادها بيتعاركوا؟؟
بعد ما كانوا ف اللقمة والضحكة وحتى الدمعة بيتشاركوا؟!


وف الآخر بتقولوا انكو بتحبوهـــــــــــــا !!!

طب ازااااااااااااااااااااااااااااااااااى ؟!!

معلش اعذرينى..
اصل فهمى على قدى..وجاوبينى؟

الا دى مصـــــر ال بيقولوا عليها؟؟
انا بشبه عليها من بعيد...


مش هى دى مصر الصبية !!!
دى واحدة تانية عجوزة وع الاسفلت منحنية..!!

لازم بايدنا احنا تانى نخليها تقوووم
ولازم شمس بكرة تطلع من ورا الغيوم
ويطلع اسمها فى العلالى لفوق النجوم

عشان كدة ارجوكى قوليلي..
مش هى دى مصـــــر اللى بيقولوا عليها
ومش هى دى اللى من بعيد بتشبه عليها !!
--------------------------
نعتذر لكـــــ يا وطــــن
ان اجبرناك ان تذوق مر الألم
وان تشاهد رُغمآ عنك
بالفتنة احتراق العلم !!

اللهم احفظ هذا البلد آمنا .. ووحد كلمتنـا فيه
وابعد عنه شر ما كان وما يكون وما سيكون
اللهـــــ آمين ــــــم